/

कोराडीत साकारलं मामाचं गाव

"हॅप्पी स्ट्रीट" कार्यक्रमात ५ हजार व्यक्तींचा प्रत्यक्ष सहभाग

(कोराडी २७ ऑक्टोबर २०२४) : पूर्वीच्या काळी मामाच्या गावाला जाऊन धमाल मस्ती करायची, गावाकडील निसर्गरम्य मातीशी नातं जोडीत, नात्यांची वीण अधिक घट्ट करायची अशी आपली मराठमोळी संस्कृती. मात्र धकाधकीच्या जीवनात मामा देखील शहरात राहायला आल्याने मामाच्या गावचे कुतूहल काहीसे कमी झाले आणि ही जागा टी.व्ही., मोबाईल, फेसबुक, व्होट्सप सारख्या आभासी दुनियेने व्यापल्याने जीवनाचा खरा-खुरा आनंदच दूर झाला. मानवी जीवन तांत्रिक झाले, यातून उदयास आलेली शहरी संकल्पना म्हणजे "हॅप्पी स्ट्रीट". मामाच्या गावाला न जाता सुटीच्या दिवशी सकाळच्या प्रहरी मुख्य रस्त्यावरील रहदारी काही वेळापुरता इतरत्र वळवून त्याठिकाणी मनसोक्त खेळ, धमाल मस्ती करायची, हा यामागचा उद्देश.

महानिर्मितीच्या कोराडी औष्णिक विद्युत केंद्राच्या ५० व्या सुवर्ण महोत्सवी वर्धापन दिना निमित्ताने कोराडी विद्युत विहार वसाहतीतील कामगार मनोरंजन केंद्रालगतच्या सभोवताली रस्त्यावर "हॅप्पी स्ट्रीट" मामाचं गाव साकारण्यात आले. वीज केंद्राच्या अधिकारी-कर्मचारी व कुटुंबीयांनी यामध्ये उत्स्फूर्त सहभाग घेतला. विशेषतः सुमारे ५ हजार व्यक्तींनी या कार्यक्रमाचा भरपूर आनंद घेतला.

हिरव्यागार वृक्षांच्या सावलीत, रंगबिरंगी फुगे, झेंडे, तोरणांनी रस्ते आकर्षक सजले होते. तर वयाचे भान विसरून, आपलं-परकं विसरून, प्रत्येकाने बालपणीच्या खेळाचा निखळ आनंद लुटला. नेहमी चारचाकी चालविणारा बैलबंडी चालवित होता तर माता-भगिनी आपल्या मुलांना विसरून टिक्कर बिल्ला, लगोरी, दोरीवरच्या उड्या, तळ्यात-मळ्यात, झुले,पाळणे,मामाचं पत्र हरवलं इत्यादी खेळांचा मनसोक्त आनंद घेत होत्या. चार तास कसे संपले कोणालाच कळाले नाही. घराकडे परतीची पाउले वळायला तयार नव्हती एवढा जीव "हॅप्पी स्ट्रीट" मामाच्या गावाने लावला. एरवी घरात बोलायला वेळ नसणारी पालक मंडळी "हॅप्पी स्ट्रीट" वर एकमेकांशी खुलून बोलताना दिसली तर मुले-मुली देखील आपले आई-वडील टायर, लोखंडी रिंग चालवित धावत असल्याचे पाहून आश्चर्य चकित झाले.जात,पात,धर्म,वय,पद, गर्व दूर सारून प्रत्येक व्यक्ती स्वत:ला व्यक्त करीत नि:स्वार्थपणे सहभागी झाल्याचे दिसून येत होते. "हॅप्पी स्ट्रीट" च्या माध्यमातून अख्ख मामाचं गावच कोराडीत साकारण्यात आले होते. हिरव्यागार झाडयांच्या सावलीत मचान, झोपडी निर्माण करुन सभोवताली प्रति शेती पिकवून अस्सल गावाचे वातावरण तयार करण्यात आले.

अखंडित वीज उत्पादनाचे राष्ट्रीय कार्य करणाऱ्या कोराडी वीज केंद्राच्या अधिकारी-कर्मचारी व त्यांच्या कुटुंबियांसाठी मामाचं गांव, "हॅप्पी स्ट्रीट" हा उत्तम पर्याय असल्याचे मुख्य अभियंता विलास मोटघरे म्हणाले.

या कौटुंबिक कार्यक्रमाला अभूतपूर्व प्रतिसाद लाभला त्याचे कारण लहान मुला-मुलींसाठी विविध खेळ, बक्षिसे, बुढ्ढी का बाल(शुगर कँन्डी), बंदुकीच्या गोळीने फुगे फोडणे, दोरीचे झुले, छकडा-रेंगी, बैलगाडी-गायवासरू, बॉल गेम्स, सापशिडी, टायर, तोफ, लोखंडी रिंग चालविणे, दोरीवरच्या उड्या, लहान सायकल, स्केटिंग तर तरुणी व महिलांसाठी मेहंदी, टॅटू, बॅडमिंटन, फुटबॉल, लगोरी, दोरीवरच्या उड्या, कंबर रिंग, प्लेट थ्रो, रबर रिंग, पुरुष वर्गासाठी फुटबॉल, प्लेटथ्रो, बॅडमिंटन, रेखाचित्र, कंचे, भवरे, सेल्फी पॉईंट इत्यादी उपलब्ध होते. फूड झोनमध्ये इंडियन कॉफी हाउसचे खाद्यपदार्थ,आईस्क्रीम, समोसा, आलूवडा,चहा, ढोकळा, मोमो, मोड कडधान्ये, भेळ, चना मसाला, पाणीपुरी, नारळपाणी, अश्या नानाविध खाद्यपदार्थांची रेलचेल होती. ज्येष्ठ नागरिकांसाठी योगासन,भजन मंडळी, बुद्धिबळ, कॅरम, वृत्तपत्र,मासिके वाचन व झुम्बा डान्स थरार, झेमबे आफ्रिकन वाद्य तर आदिवासी गोंडी नृत्य ज्यामध्ये गाणे,नृत्य इत्यादी कला अनेकांनी सादर केल्या.

कोराडी औष्णिक विद्युत केंद्राचे मुख्य अभियंता विलास मोटघरे यांच्या मार्गदर्शनाखाली हॅप्पी स्ट्रीट आयोजन समितीच्या सहकार्याने "हॅप्पी स्ट्रीट" (मामाचं गाव) कार्यक्रम अतिशय यशस्वीरीत्या संपन्न झाला.

कार्यक्रमाला कार्यकारी संचालक पंकज सपाटे, विवेक रोकडे, मुख्य अभियंते सुनील सोनपेठकर, विराज चौधरी, राजेश कराडे, उप मुख्य अभियंते शैलेंद्र कासुलकर, सचिन देगवेकर, भास्कर इंगळे, शैलेंद्र गजरलवार, अधीक्षक अभियंते सचिन भगेवार किरण नानवटकर, परिमल रामटेके, सारिका सोनटक्के, कुणाल घाटे, राजेश डाखोळे, मनोज उमप, देवेंद्र भादीकर,सीमा महल्ले महाव्यवस्थापक (वित्त व लेखा) यशवंत मोहिते मुख्य जनसंपर्क अधिकारी, अतुल बोरकर उप महाव्यवस्थापक, डॉ. अमित ग्वालबंशी, प्रवीण मडावी, कल्याण अधिकारी मयूर मेंढेकर, देवेंद्र राठोड वरिष्ठ व्यवस्थापक(सुरक्षा), महेश घुरिले- सचिव, प्रवीण बुटे-समन्वयक, विभाग प्रमुख, पुरुष-महिला मुले-मुली मोठ्या संख्येने उपस्थित होते. कार्यक्रमाचे सूत्र संचालन आर जे प्रीती आणि अजिंक्य यांनी केले.

कार्यक्रमाच्या यशस्वितेत "हॅप्पी स्ट्रीट" आयोजन समितीच्या पदाधिकारी व सदस्यांनी मोलाची भूमिका बजावली तसेच स्थापत्य, विद्युत, अग्निशमन, सुरक्षा तसेच सर्व विभागांचे मोलाचे सहकार्य लाभले.